आरोग्य व शिक्षण

शिवार संमेलन म्हणजे ऐतिहासिक, सांस्कृतिक घटना – डॉ. राजेंद्र मुंढे

समारोपीय कार्यक्रमात प्रज्ञावंतांचा सत्कार

किशोर कारंजेकर 

वर्धा – अलीकडच्या काळात कृषीसंस्कृतीच्या वाहक असलेल्या लोककला आणि लोकसाहित्य नष्ट होत आहे की काय, असे वाटत असताना ‘शिवार’सारखी संमेलने वेगळे बळ देतात. अशी संमेलने गावोगावी झाल्यास लोकसंस्कृती संवर्धनाची चळवळ निर्माण होईल. हे पहिले शिवार संमेलन म्हणजे एकमेवव्द्वितीय सांस्कृतिक, ऐतिहासिक घटना होय, असे प्रतिपादन विदर्भ सांस्कृतिक आघाडीचे समन्वयक तथा समीक्षक डॉ. राजेंद्र मुंढे यांनी कुरझडी (जामठा) येथे आयोजित मातोश्री मुक्ताई स्मृती शिवार संमेलनाच्या समारोपीय कार्यक्रमात केले. 
किरण बहुद्देशीय सेवा संस्थेद्वारे आयोजित या पहिल्या शिवार संमेलनाच्या समारोप कार्यक्रमात शैक्षणिक, सामाजिक, सांस्कृतिक आणि साहित्य क्षेत्रात चार दशकांपासून अधिक काळ सातत्यपूर्वक सेवा देणारे राष्ट्रभाषा प्रचार समितीचे प्रधानमंत्री डॉ. हेमचंद्र वैद्य व आधारवडचे संस्थापक प्रा. शेख हाशम तसेच डॉ. रत्ना चौधरी नगरे व प्राचार्य दशरथ नगरे या दाम्पत्याचा संमेलनाध्यक्ष तथा नाट्यसमीक्षक डॉ. सतीश पावडे यांच्या हस्ते शाल, मानपत्र, सन्मानचिन्ह, वृक्षरोप व ग्रंथ देऊन सत्कार करण्यात आला. यावेळी, यशवंतराव दाते स्मृती संस्थेचे अध्यक्ष प्रदीप दाते, शिवार कवी संमेलनाचे अध्यक्ष संजय इंगळे तिगावकर, नागपूर विभागीय माहिती संचालनालयातील दृक-श्राव्य विभागाचे प्रमुख आशीष यावले यांची प्रमुख उपस्थिती होती. कोरोना महामारीच्या भयाण सावटातून बाहेर पडत असताना सदर संमेलनाचे आयोजन म्हणजे कलासक्त मनाला उभारी देणारी झुळूक आहे, असे डॉ. राजेंद्र मुंढे म्हणाले. तर, निकोप सामाजिक व्यवस्थेसाठी बहुसांस्कृतिक जीवनशैली आवश्यक आहे. वर्धाभूमी प्रयोगशील असून शिवार संमेलनाचे अनुकरण महाराष्ट्रातच नव्हे तर देशभर होईल, असा विश्वास समारोपीय भाषणात डॉ. सतीश पावडे यांनी व्यक्त केला. खरा भारत हा ग्रामीण भागात वसलेला असल्याने ‘खेड्याकडे चला’, असे महात्मा गांधी म्हणायचे. त्यामुळे जगभर वावरत असताना आपली नाळ मातीशी, गावाशी आणि ग्रामीण जीवनशैलीशी जोडून ठेवा, असे मत सत्काराला उत्तर देताना डॉ.हेमचंद्र वैद्य यांनी मांडले. संमेलनस्थळी असलेल्या प्रतीकांनी आपले बालपण जागे केले असून शिवार संमेलन भूतकाळात घेऊन गेले. शिक्षक हा विद्यार्थ्यांना मार्गदर्शन करतोच, पण त्यातून काय आत्मसात करायचे हे विद्यार्थ्यांवर अवलंबून असते. संमेलन संयोजिका डॉ. रत्ना चौधरी यांनी विद्यार्थिनी म्हणून जिद्द, चिकाटी आणि ज्ञानपिपासा बाळगत जे सुयश प्राप्त केले तोच आमचा सर्वात मोठा सत्कार होय, असे भावुक उद्गार सत्कारमूर्ती प्रा. शेख हाशम यांनी काढले. कार्यक्रमाचे संचालन ज्योती भगत यांनी केले तर आभार डी. एन. नगरे यांनी मानले. 

*प्रतिभावंतांचा, गुणवंतांचा सत्कार*
या कार्यक्रमात विविध क्षेत्रातील योगदानाबद्दल रंजना दाते, जया परमार, डॉ. माया रंभाळे, श्रुतिका सालोडकर, प्रा. पद्माकर बाविस्कर, चित्रकार आशीष पोहाणे, पक्षीमित्र प्रा. किशोर वानखेडे, वृक्षमित्र मुरलीधर बेलखोडे, कवी संदीप धावडे दहीगावकर, छायाचित्रकार शेखर सोनी, चलचित्रणकार निखिल खोडे या प्रतिभावंतांचा उपस्थित अतिथींच्या हस्ते सत्कार करण्यात आला. या पहिल्या शिवार संमेलनाच्या आयोजन समितीतील सदस्य प्रफुल पुणेवार, प्रा. किरण नगरे, डॉ. सुधीर अग्रवाल, डॉ. गिरीश वैद्य, वैशाली भोयर ,माधुरी देशमुख, अर्चना हातेवार, मंदा तरंगे, मनीषा साळवे, डॉ. सुनीता भुरकुंडे, डॉ. रेखा बोबडे, अनिकेत पेंदाम, तेजस भातकुलकर, प्रा. सिद्धी राऊत, प्रा. किशोर डंभारे, प्रा. अभिजीत पाटील, मीनल गिरडकर, छाया राडे, दिलीप पिस्तुलकर, राहुल तळवेकर, आयुषी चांदेकर, अश्विनी रोकडे, कुणाल वैद्य, राजू बावणे, विष्णुकुमार, नीरज आगलावे, हर्षवर्धन वैद्य, सिद्धेश पुणेवार, मालती वैद्य, प्रथमेश पुणेवार, राजश्री वैद्य, विनोद ढोबाळे, प्रवीण सालोडकर, ओवी देशमुख यांचाही यावेळी प्रमाणपत्र देऊन सन्मान करण्यात आला.

*शिवार सेल्फी पॉईंट आकर्षणाचे केंद्र*
मातोश्री मुक्ताई स्मृती शिवार संमेलनात सर्वांच्या आकर्षणाचे केंद्र ठरलेल्या शिवार सेल्फी पॉईंटचे उद्घाटन आशीष यावल यांच्या हस्ते व सरपंच किरण चौधरी यांच्या उपस्थितीत करण्यात आले. ग्रामीण लोकजीवन, लोकसंस्कृती आणि लोककला यांचे प्रतीक असलेल्या अनेक वस्तूंची सजावट या सेल्फी पॉईंटमध्ये करण्यात आली होती. उखळ, मुसळ, जाते, पाटावरवंटा, परडी, सुपंटोपले, मडकी, चूल, मातीची भांडी, लाकडी भांडी, खाटा, खाचर, बंडी, दमणी, दिंडी दरवाजा, गवती छप्पर, कोनाड्याची भिंत, कंदील आणि सुगरणीचा खोपाही यात समाविष्ट होता. या सेल्फी पॉईंटची कलात्मक निर्मिती व मांडणी डॉ. रत्ना चौधरी, तेजस भातकुलकर, प्रवीण सालोडकर, तृप्ती यांनी केली तर सामग्री संयोजन राहुल तळवेकर, श्रुतिका सालोडकर, अनिता कडू, भारती नेनाव, प्रियंका वैद्य यांचे होते.

बातमी शेअर करणायसाठी येथे क्लिक करा

Related Articles

Leave a Reply

Your email address will not be published.

Back to top button
भाषा बदला»
बातमी कॉपी करणे हा कायद्याने गुन्हा आहे