Breaking
ब्रेकिंग

भरधाव कारच्या धडकेत दिव्यांग “गजानन”चा मृत्यू ; मोठ्या भावाचाही महिनाभरापूर्वी मोटारसायकलने अपघात

1 9 7 0 1 5

सचिन धानकुटे

सेलू : – भरधाव कारने दिलेल्या धडकेत दिव्यांग गजाननचा दुर्दैवी मृत्यू झाल्याची घटना मंगळवारी रात्रीच्या सुमारास घडली. आपल्या इलेक्ट्रिक बाईकने तो आठवडी बाजारातून घरी परतत होता. यावेळी सेलू ते रेहकी दरम्यान असलेल्या निर्मल जिनींगपासून काही अंतरावर त्याच्या बाईकला भरधाव कारने धडक दिली. यात गंभीर जखमी झालेल्या गजाननचा नागपूर येथील रुग्णालयात उपचारादरम्यान मृत्यू झाला. महिनाभरापूर्वीच गजाननचा मोठा भाऊ गणेश हा देखील मोटारसायकल अपघातात गंभीर जखमी झाला होता.

      रेहकी येथील गजानन वासुदेव साठोणे(वय३०) हा सेलूच्या आठवडी बाजारातून बाजार घेतल्यानंतर आपल्या इलेक्ट्रिक बाईकने रेहकीच्या दिशेने जात होता. दरम्यान सदर रस्त्यावरील निर्मल जिनींगपासून काही अंतरावरच त्याच्या बाईकला मागाहून भरधाव आलेल्या अज्ञात कारने जबर धडक दिली आणि धडक देणारे वाहन रेहकीच्या दिशेने भरधाव वेगात निघून गेले. हा अपघात काल मंगळवारी रात्री ७ वाजून ४० मिनिटांनी घडला. सदर अपघातात दिव्यांग गजाननच्या डोक्याला गंभीर इजा झाल्याने त्याला उपचारासाठी तातडीने नागपूर येथील रुग्णालयात दाखल करण्यात आले होते, परंतु उपचारादरम्यान त्याचा मृत्यू झाला.

    सदर घटनेची माहिती मिळताच सेलू पोलीस ठाण्याचे कर्मचारी अमोल राऊत, प्रकाश भोयर आणि मुडे यांनी घटनास्थळी धाव घेत पंचनामा केला. याप्रकरणी अधिक तपास सेलू पोलीस करीत आहे.

 

सार्वजनिक बांधकाम विभाग निद्रावस्थेत

    ज्या ठिकाणी सदर अपघात घडला, त्या ठिकाणी याआधीही अनेकदा अपघात घडलेत आणि त्यात आतापर्यंत तीघांचा मृत्यू झाला. येथील रस्ता ओबडखाबड असल्याने वाहनधारक नेहमी एकाच बाजूच्या रस्त्याचा वापर करतात आणि प्रसंगी अपघात घडतात. ही बाब बांधकाम विभागाच्या अभियंत्यांच्या देखील नजरेस पडली. परंतु त्यांनी याकडे साफ दुर्लक्ष केल्यानेच वारंवार अपघात घडत असल्याचे दिसून येते. निदान आता तरी सार्वजनिक बांधकाम विभाग याकडे लक्ष केंद्रित करणार का.. असा प्रश्न उपस्थित होत आहे.

 

सीसीटीव्ही कॅमेरे ठरले निव्वळ देखावा

    सदर रस्त्यावर येणाऱ्या जाणाऱ्या वाहनांची ज्या सीसीटीव्ही कॅमेरात नोंद व्हायची, ते दोन्ही कॅमेरे यावेळी बंद होते. त्यामुळे धडक देणाऱ्या अज्ञात वाहनाची ओळख पटविण्याचे आव्हान पोलिसांसमोर उभे ठाकले आहे. निर्मल जिनींगसमोरचा रस्ता सध्या अपघात प्रवणस्थळ बनला आहे. तेथील कॅमेरा तर बंद होताच, शिवाय ह्याच रस्त्यावरील भटेरो यांच्याकडील सीसीटीव्ही देखील कोमात गेल्याने ते केवळ शोभेची बाहुली ठरलेत.

5/5 - (2 votes)
बातमी शेअर करण्यासाठी येथे क्लिक करा
1 9 7 0 1 5

Related Articles

Leave a Reply

Your email address will not be published. Required fields are marked *

Back to top button
Translate »
बातमी कॉपी करणे हा कायद्याने गुन्हा आहे