क्रिडा व मनोरंजन

मराठी समीक्षेचा प्रांत समृद्ध करणारे ग्रंथ : लक्ष्मीकांत देशमुख

डॉ. सतीश पावडे लिखित नाट्यसमीक्षा ग्रंथांचे लोकार्पण

किशोर कारंजेकर 

वर्धा : ‘मराठी रंगभूमी आणि ॲब्सर्ड थिएटर’ तसेच ‘मराठी रंगभूमी : चर्चा आणि चिंतन’ हे नाट्यसमीक्षा ग्रंथ मराठी नाट्यसमीक्षेचा प्रांत समृद्ध करणारे आंतरराष्ट्रीय दर्जाचे ग्रंथ असून नाट्य अभ्यासक, समीक्षक, संशोधक आणि कलावंतांसाठी उपयुक्त ठरणारे आहेत. हे दोन्ही मौलिक समीक्षा ग्रंथ वगळून कुठलीही नाट्यसमीक्षा आणि संशोधन पूर्णत्वास जाऊ शकणार नाही, असे प्रतिपादन महाराष्ट्र शासनाच्या भाषा सल्लागार समितीचे अध्यक्ष, कादंबरीकार तथा ९१ व्या अ. भा. मराठी साहित्य संमेलनाचे अध्यक्ष लक्ष्मीकांत देशमुख यांनी लोक महाविद्यालयाच्या सभागृहात आयोजित डॉ. सतीश पावडे लिखित नाट्यसमीक्षा ग्रंथांच्या प्रकाशन सोहळ्यात केले. 
यशवंतराव दाते स्मृती संस्था, किरण बहुद्देशीय सेवा संस्था, मराठी कवी लेखक संघटना, संगीतसूर्य केशवराव भोसले राष्ट्रीय सांस्कृतिक परिषद आणि युवा कला सांस्कृतिक संस्था यांच्या संयुक्त विद्यमाने जागतिक रंगभूमी दिनी डॉ. सतीश पावडे यांच्या ‘मराठी रंगभूमी : चर्चा आणि चिंतन’ व ‘मराठी रंगभूमी आणि ॲब्सर्ड थिएटर’ या दोन नाट्यसमीक्षा ग्रंथांचे प्रकाशन लक्ष्मीकांत देशमुख यांच्या हस्ते करण्यात आले. कार्यक्रमाच्या अध्यक्षस्थानी प्रसिद्ध लेखक, समीक्षक आणि कादंबरीकार प्रा. अविनाश कोल्हे होते. विशेष अतिथी म्हणून प्रसिद्ध कवयित्री, समीक्षक डॉ. पद्मरेखा धनकर तर भाष्यकार म्हणून डॉ. राजेंद्र मुंढे, प्रा. प्रसेनजीत तेलंग यांची उपस्थिती होती.  
*समकालीन रंगभूमीची साक्षेपी समीक्षा – प्रा. कोल्हे*
मराठी रंगभूमीचा इतिहास हा प्रभावांचा इतिहास आहे. हा प्रभाव पचवून, परिष्कृत करून त्याला अस्सल मराठी बाज चढवून नवता आणि प्रयोगशिलता मराठी रंगभूमीने सिद्ध केली. ‘मराठी रंगभूमी : चर्चा आणि चिंतन’ या ग्रंथात अशा अनेक अस्पर्शित विषयांची डॉ. पावडे यांनी चिकित्सा केली आहे. ‘मराठी रंगभूमी आणि ॲब्सर्ड थिएटर’ हा त्यांचा ग्रंथही प्रादेशिकतेच्या सीमा ओलांडून वैश्विकतेचा परिप्रेक्ष्य मांडतो. समकालीन रंगभूमीची साक्षेपी समीक्षा करणारी ही दोन्ही पुस्तके अत्यंत महत्त्वाची आहेत, असे अध्यक्षीय भाषणात प्रा. अविनाश कोल्हे म्हणाले.
कार्यक्रमाचे प्रास्ताविक प्रदीप दाते यांनी केले. अतिथींचा परिचय डॉ. रत्ना चौधरी नगरे यांनी, सदिच्छा संदेशाचे वाचन अनिता कडू यांनी तर सन्मानपत्राचे वाचन पल्लवी पुरोहित यांनी केले. कार्यक्रमाचे संचालन ज्योती भगत यांनी केले तर आभार संगीतसूर्य केशवराव भोसले राष्ट्रीय सांस्कृतिक परिषदेचे कार्याध्यक्ष नंदकुमार वानखेडे यांनी मानले. कार्यक्रमाच्या आयोजनात रंजना दाते, संजय इंगळे तिगांवकर, राजू बावणे, आयुषी चांदेकर, अश्विनी रोकडे, नीरज आगलावे, प्राचार्य डॉ. पुष्पा तायडे, शेखर सोनी, अरुण सानप यांचे महत्त्वपूर्ण सहकार्य लाभले. या प्रकाशन सोहळ्याला साहित्य व नाट्यप्रेमी रसिक उपस्थित होते.

बातमी शेअर करणायसाठी येथे क्लिक करा

Related Articles

Leave a Reply

Your email address will not be published.

Back to top button
भाषा बदला»
बातमी कॉपी करणे हा कायद्याने गुन्हा आहे